Carballo a un paso

Compartir:

Volve Metro cadrado, microteatro en espazos non convencionais

Ana Abad de Larriva, Núñez&Is, Sara Guerrero, David Rodas, Arroutadas e Antón Coucheiro son os finalistas da quinta edición deste certame do FIOT

Imaxe dunha función de Metro Cadrado en anteriores edicións do FIOT

Imaxe dunha función de Metro Cadrado en anteriores edicións do FIOT

7 de agosto de 2021 - A quinta edición do certame de Micro-Escenas Metro Cadrado do 30º Festival Internacional Outono de Teatro de Carballo -FIOT- xa ten pezas finalistas. Ana Abad de Larriva, Núñez&Is Socios Limitados (Jimmy Núñez e Ernesto Is), Sara Guerrero, David Rodas, Arroutadas (Lydia Prada e Mario Rodríguez) e Antón Coucheiro presentarán as súas últimas creacións experimentais nunha das liñas de programación do FIOT máis queridas polo público local, quen valorará, como é habitual, tanto a mellor interpretación coma o mellor espectáculo. O certame Metro Cadrado ofrece ao público da comarca unha nova experiencia escénica, diferente ás habituais nos recintos: sen barreiras, sen artificios e desde a proximidade. Con esta intención, o FIOT convida ás compañías ou artistas emerxentes a crear ou deseñar un espectáculo (de teatro físico, música, clown, performance, danza, manipulación de obxectos...) de entre 10 e 20 minutos, que se poida poñer en escena, especificamente, nun espazo non teatral.

O teatro invadirá espazos coma un horto urbano, un parque infantil, un palco da música ou unha ponte

Nesta edición, e tendo presente o contexto sociosanitario que limita a realización de actividade en espazos pechados ou particulares, o certame ofertou a posibilidade de xerar pezas escénicas en 12 espazos diferentes de Carballo. Finalmente, un palco da música, un horto urbano, unha ponte ou un parque infantil, entre outros, serán os escenarios que acollan seis estreas. Nesta quinta convocatoria a organización do certame recibiu un total de 36 propostas, tanto de profesionais destacados da escena galega como de colectivos ou agrupacións de afeccionados. Entre todas elas, o xurado do Metro Cadrado, conformado por figuras do sector cultural, seleccionou media ducia de espectáculos finalistas. As pezas que se poderán ver durante tres sábados do mes de outubro son A miña casa é un palco de música, de Sara Guerrero; A/O pesar do tempo, de David Rodas González; Des-abonar, de Arroutadas (Lydia Prada e Mario Rodríguez López); Na sombra, unha árbore, de Ana Abad de Larriva; OldPlay, de Antón Coucheiro; e Os crocodilos son bichos extremadamente vaidosos, de Núñez& Is Socios Limitados (Jimmy Núñez e Ernesto Is).

Tal e como é habitual no Metro Cadrado, cada espectáculo contará con catro funcións para facilitar a súa visualización por parte do público. Dúas serán en horario de mañá e outras dúas en horario de tarde. Tanto na web do FIOT coma no programa de man do festival poderanse consultar, con antelación, as horas e lugares das representacións.

Cinco anos de microteatro

O Certame de Micro-escenas Metro Cadrado nace ao abeiro do FIOT como unha proposta específica do festival de apoio á creación escénica de novos formatos e de compañías ou creadoras e creadores emerxentes. Á vez que se difunde e visibiliza o seu traballo, as artistas son quen de xerar, no marco dun festival, novas experiencias teatrais en contextos non habituais para a representación escénica. Ao longo destes cinco anos, Metro Cadrado acadou un importante éxito en canto ás propostas recibidas, tanto polo seu número (180) como pola calidade e diversidade das pezas; sendo quen de suscitar o interese de creadores e creadoras de múltiples perfís  (tanto de de creadores individuais, coma de equipos integrados por 3-5 persoas), da veciñanza e mesmo dos axentes económicos, comercias ou cidadáns de Carballo que colaboraron coa cesión de espazos.

Neste lustro de actividade, Metro Cadrado contou con funcións, entre outros puntos do territorio, nun lavadoiro municipal, nunha barbería, nunha perruquerría, nunha paquetaría, nas fiestras da Ludoteca Municipal ou mesmo no Salón de Plenos. Entre os nomes de recoñecida traxectoria na escena galega que pasaron polo certame nas últimas edicións atópanse Iria Sobrado, Helena Salgueiro ou Iria Pinheiro, entre outras. Precisamente Pinheiro presentou na pasada edición a derradeira función da súa peza Croquetas e fíxose co premio á Mellor Interpretación, mentres que a proposta Lara Hierro: monólogo para o corpo en movemento, de Constance Hurlé, obtivo o visto e prace do público co recoñecemento de Mellor Espectáculo.


Ligazóns

Feader Ministerio de agricultura, alimentación y medio ambiente Xunta de Galicia Deputación da Coruña Galicia Agader Costa da Morte - Terra Atlántica