Carballo a un paso

Compartir:

Carballo presumirá de novo este verán de tres bandeiras azuis

A senda costeira Razo-Baldaio tamén renova a distinción de Sendeiro Azul que concede a Asociación de Educación Ambiental e do Consumidor (ADEAC)

Vista da praia de Baldaio-As Saíñas

Vista da praia de Baldaio-As Saíñas | 📷 Turismo Carballo

12 de maio de 2022 - Se buscas augas claras e limpas nas que desfrutar do Atlántico, xa tes destino para este verán. Porque aínda que vos aseguramos que os areais carballeses cumpren con todos os requerimentos para aproveitar ao máximo a vosas vacacións, tamén temos organismos oficiais que nos avalan. Así, a Bandeira Azul volverá a ondear este verán nas praias de Baldaio-As Saíñas, Pedra do Sal e Razo. A Asociación de Educación Ambiental e do Consumidor (ADEAC) vén de facer pública a listaxe de praias con Bandeira Azul, que ten como principal obxectivo estimular o cumprimento da Directiva de Calidade de Augas de Baño da Unión Europea. Neste sentido, as cinco zonas de baño do noso litoral que están controladas sanitariamente (Pedra do Sal, Razo, Arnados, Ría de Baldaio e As Saíñas) acadaron a cualificación de excelente, segundo a clasificación sanitaria que podes consultar aquí. Ademais de premiar a calidade das augas de baño, dos areais e dos servizos que prestamos aos usuarios e usuarias, ADEAC tamén volve a distinguir este ano a Senda do Mar Razo-Baldaio como Sendeiro Azul.

Ademais de premiar a calidade das augas de baño, o distintivo valora tamén os servizos dispoñibles

En Carballo traballamos na procura da excelencia en todos os parámetros que determinan a saúde do noso litoral e a calidade dos servizos que se prestan nel. Grazas ao traballo que se desenvolve ao longo do ano, Carballo vén renovando o distintivo da Bandeira Azul para diferentes espazos, e ademais é o único concello da Costa da Morte e un dos poucos de Galicia que conta cos certificados ISO 14001 e EMAS (Certificado do Esquema Europeo de Ecoxestión e Auditoría), que implican un compromiso coa prevención da contaminación, a mellora continua do areal, a xestión de residuos e, ademais, permiten que os usuarios e usuarias poidan presentar reclamacións.

Seguridade con 32 socorristas

Nestes momentos está en marcha tamén o proceso de selección dos 32 socorristas que traballarán este verán nos nosos areais, ao tempo que, de maneira coordinada coas diferentes institucións, empresas e entidades implicadas no desenvolvemento sostible do litoral, estamos a realizar a planificación de todos os servizos de cara á temporada estival.Dende o ano 2014 temos implantado un sistema de xestión ambiental, de cuxo seguimento se encarga un órgano xestor e que ten como principal obxectivo converter as praias carballesas nun referente paisaxístico sostible co medio ambiente.

Neste sentido resulta imprescindible a colaboración de todas as persoas usuarias para realizar unha xestión correcta dos residuos, ademais de respectar as especies de flora e fauna autóctonas da nosa costa, algunha tan ameazada coma a píllara das dunas, e de respectar as medidas relativas á presenza de cans, que está totalmente prohibida desde o 1 de xuño ata o 30 de setembro.


Feader Ministerio de agricultura, alimentaci?n y medio ambiente Xunta de Galicia Deputaci?n da Coru?a Galicia Agader Costa da Morte - Terra Atl?ntica