A ruta das praias
Percorrer, coas ondas acariñando os pés e o cheiro a salitre, o litoral comprendido entre Razo e Baldaio.
As e os carballeses adoran este percorrido entre Razo e Baldaio, ao redor de cinco quilómetros que constitúen o complemento idóneo para un longo día de praia.
Mais unha ruta completa pola costa de Carballo ha de comezar antes, na praia de Santa Mariña, e finalizar alén os lindes de Baldaio e a Pedra do Sal, na praia de Leira. En total, once quilómetros, dende os límites con Malpica até as proximidades de Caión, que propoñemos percorrer a pé, respirando fondo o alento do mar.
A ruta atravesa todo o litoral do concello de Carballo. Atoparás estupendos miradoiros naturais, como o de Santa Mariña, con amplas vistas que van dende Malpica até Punta Langosteira, preto da Coruña, ou Santa Irene de Castrillón, onde poderás aprezar a beleza do espazo natural Razo-Baldaio.
Encontrarás bulicio no areal de Razo, o máis concorrido da zona; tranquilidade en Baldaio, espazo natural protexido recoñecido pola UE como zona de especial protección para as aves, e intimidade nas calas e pequenas praias que atoparás entre as rochas, dende a Pedra do Sal até o antigo porto baleeiro de Caión.
